Styremedlem Bjarte Solheim jobbar med stipendutvikling på vegner av idrettsrådet.

Idrettsrådet samarbeider med kommunen om etablering av eit idrettsstipend for Kvinnherad. Stipendet er førebels på skissestadiet og innspel vert motteke med takk!

Verksemda Kultur og fritid i Kvinnherad kommune vil vere sekretariat for stipendet og idrettsrådet vil vere jury for tildeling. Det er ønskjeleg at private verksemder stiller som sponsorar og gir stipendet ein god økonomi.

I 2015/2016 vert det arbeidd med statuttar og føremål for stipendet. Har du innspel til dette kan det sendast til post@kvinnheradidrettsrad.no. Det kan til dømes gå på føremål (elite, breidde, anlegg, frivillig innsats, osb.), finansiering, storleik og aktuelle sponsorar.

Ni personar frå fire organisasjonar var med på kurset og fekk ein god gjennomgang av reglar og ordningar for finansiering av idrettsanlegg og nærmiljøanlegg.

Kulturdepartementet fordeler kvart år tilskot av spelemidlane til anlegg for idrett og fysisk aktivitet. Anlegg som det skal søkjast om spelemidlar til må vera del av kommunen sin handlingsplan for idrett, fysisk aktivitet og friluftsliv og denne vert rullert kvart år.

Programmet for kvelden var slik:

• Velkomen og kort orientering frå Kvinnherad idrettsråd v/Anbjørn Høivik, idrettsrådet
• Rullering av handlingsplan for idrett, fysisk aktivitet og friluftsliv v/ Linda Øen, Kvinnherad kommune
• Korleis søka? Søknadsskriving frå A – Å v/ Linda Øen, Kvinnherad kommune

Materiellet frå kurset kan lastast ned i pdf-format her:

• Intro KIR spelemiddelkurs 2015
• Spelemiddelorientering 2016 Linda Øen
• Rettleiing for søknad om spelemidlar i Kvinnherad kommune 2015
• Kommunedelplan for idrett, fysisk aktivitet og friluftsliv 2014-2022
• Rullert handlingsprogram 2015-2019

Nyttig informasjon om spelemiddelsøknadar: http://www.idrettsanlegg.no/

Rådet har så langt styret veit ikkje eigne lover i dag. Styret har laga eit framlegg med utgangspunkt i idrettsforbundet sine standardlover for idrettsråd, berre supplert med spesifikke opplysningar for Kvinnherad Idrettsråd.

Her kan du opna lovframlegget: Framlegg Vedtekter for Kvinnherad idrettsråd

Raud tekst viser tillegg og spesifisering spesielt for Kvinnherad Idrettsråd. Bortsett frå det følgjer framlegget NIF si norm. Hordaland Idrettskrins har stadfesta at lovframlegget vert godkjent av dei. Dersom din organisasjon har merknader eller innspel til framlegget må dei sendast til idrettsrådet innan 1. november 2015 på e-post post@kvinnheradidrettsrad.no.

Heilt sidan 1980-talet har det vore jobba med ein samla plan for Husnes idrettssenter,  men arbeidet stoppa opp kring 2005. Etterslepet er stort og idrettslaga har alt for lenge vore nøydde til sjølv å ta hovudansvar for utbygging av anlegg i Kvinnherad.

Formannskapet har i 2015 vist stor entusiasme på idrettens vegner og meiner dette som ein måte å gjere Kvinnherad meir attraktiv for unge. Dette samsvarar godt med idrettsforbundet sine verdiar, og idrettsrådet ønskjer denne utviklinga velkomen.

Kommunen vil ikkje få til bygging av ny fleirbrukshall på Husnes utan å investera eigne midlar i prosjektet. Det er difor viktig at kommunen sin eigen plan for idrett, fysisk aktivitet og friluftsliv vert lagt til grunn for det vidare arbeidet. I denne planen har nye idrettshallar på Husnes og i Rosendal høg prioritet, og det er føresett at desse prosjekta får eigne postar i kommunen sitt investeringsbudsjett.

Samstundes må det øyremerkast byggetilskot til ordinære idrettsanlegg, nærmiljøanlegg og friluftslivstiltak i bygdene elles. Dette er skildra i same plan, og det er føreslege ein million kroner årleg som ein høveleg start. Desse midlane vil i tillegg til å tenne dugnadsanda også utløysa tippemidlar.

Mest kvar bygd har «aksjar» i eit idrettslag. I ei tid der det offentlege effektiviserer drifta og sentraliserer tenestene er det viktig at den frivillige sektoren i samfunnet får styrka sine moglegheiter til å utvikla tilbod og møteplassar for innbyggjarane. Difor bør også driftstilskota aukast til ein million årleg. Også dette er ein start, og også dette står i idrettsplanen.

Idrettsrådet publiserte i juni 2015 ein uttale om dette og heile teksten finn du her:

KIR uttale 2015.06.10 idrettshall